A experiencia do equipo Cartotec en organismos internacionais da talla do Banco Mundial facúltanos para xestionar calquera tipo de proxectos desde o minuto 1. Calquera idea de emprendemento empresarial ou social a prol do desenvolvemento territorial pode atopar na nosa empresa os coñecementos necesarios para se facer realidade. Estudar o contexto, procurar fontes de financiamento, valorar os riscos e posibilidades dun proxecto, artellar un plan de desenvolvemento, chegar ao público ou cliente obxectivo, organizar as etapas de implementación, avaliar as necesidades técnicas e humanas de cada proposta ou resolver os requirimentos das administracións son só algúns dos servizos que Cartotec é quen de cubrir neste campo. A profesionalidade amplamente recoñecida do noso persoal especializado facilita a realización de ideas por pouco desenvolvidas que estean . Acompañamos os nosos clientes desde o primeiro momento ata a concreción da súa proposta.
Todos os nosos estudos e proxectos son desenvolvidos aplicando ferramentas de análise como o “enfoque do marco lóxico”, empregado nos proxectos de financiamento europeo e outras axencias internacionais para o desenvolvemento. Estes procedementos permiten a correcta identificación dos problemas e beneficiarios de cada acción, base imprescindible para a formulación dos obxectivos e estratexias a seguir. Tamén se establecen indicadores de actividade para medir o impacto e o retorno que xera a execución do proxecto e analízase como afecta, entre outras, ás dinámicas comerciais, sociais e ambientais.